Friday, September 16, 2011

പെട്രോൾ വില

പെട്രോൾ വില.

പെട്രോൾ വില വീണ്ടും കൂടി. കൂടട്ടെ. സഹിക്കാൻ ബാദ്ധ്യസ്ഥമായ ഒരു ജനത ഉണ്ടിവിടെ. ഇതിനെതിരെയൊക്കെ പ്രതികരിക്കുന്നവരെ പോലും കളിയാക്കുന്നവർ.സമരവിരുദ്ധർ.ജനാധിപത്യത്തിൽ ഭരണകൂടത്തെ തിരിച്ച് വിളിയ്ക്കാനുള്ള അവകാശം ജനങ്ങൾക്കില്ലാത്തിടത്തോളം ഇതൊക്കെ ഇനിയും തുടരും.

പെട്രോൾ വില കൂട്ടിയതിൽ പ്രതിഷേധിക്കാൻ സി.പി.എം


ഒരു പന്തംകൊളുത്തി പ്രകടനം. ഒരു പോസ്റ്റ് ഓഫീസ് ധർണ്ണ. ഒരു റെയിൽ വേ ഉപരോധം.പിന്നെ ഒരു ഹർത്താലും. തീർന്നു!

ആ‍ർ.എസ്.എസ് അക്രമം

തിരുനനന്തപുരത്ത് ഒരു സാംസ്കാരിക സമ്മേളനത്തിൽ പങ്കെടുത്ത സ്വാമി അഗ്നിവേശിനെതിരെ ആർ.എസ്.എസ് ആക്രമണം. ഒരു സ്വാമി ആയിട്ടുകൂടിയും അവരുടെ സ്വന്തം ആളല്ലാത്തതുകൊണ്ടാണ് ആക്രമണം. ഇതാണ് ആർ.എസ്.എസിന്റെ ജനാധിപ്യബോധം. ഇവരെയൊക്കെ വച്ചു വേണം നമ്മൾ ജനാധിപത്യത്തെ ശക്തിപ്പെടുത്താൻ! ആർ.എസ്.എസിനു ഒരു അഭിനന്ദനം!

പെൻഷൻ പ്രായം കൂട്ടാൻ പോകുന്നു

കൂട്ടട്ടെ. പറ്റുമെങ്കിൽ മരണംവരെ ഉദ്യോഗത്തിലിരുത്തണം. മരണം വരെ വേറെ ഒരുത്തനും ജോലിയ്ക്ക് കയറരുത്.

പ്ലസ് -വണ്ണിന് നാലാം അലോട്ട്മെന്റ്

പ്ലസ് വണ്ണിന് ക്ലാസ്സ് തുടങ്ങിയിട്ട് രണ്ടര മാസത്തോളമായി. ഇനി അഞ്ചാം അലോട്ട്മെന്റ് പ്ലസ് ടൂ ആയിട്ട് നടത്തിയാലും മതി!

റോഡുകളുടെ സ്ഥിതി ദയനീയമെന്ന് വി.എസും, കുഞ്ഞാലിക്കുട്ടിയും

സമ്മതിച്ചല്ലോ. അതുതന്നെ വലിയ കാര്യം. നമ്മൾ ജനങ്ങൾ എങ്ങനെയെങ്കിലും സഞ്ചരിച്ചോളാം. നമ്മുടെ നട്ടെല്ലൊടിയുന്നതിൽ നിങ്ങൾക്ക് ഖേദമൊന്നുമില്ലല്ലോ.

സ്ഫോടനം ആവർത്തിക്കുന്നത് വീഴ്ചയെന്ന് ആഭ്യന്തരരാജാവ് ചിദംബരം

ഗുഡ്. ഓരോ സ്ഫോടനം കഴിയുമ്പോഴും ഇങ്ങനെ കുറ്റസമ്മതം നടത്തുക. നിങ്ങൾക്ക് അംഗരക്ഷകരുണ്ടല്ലോ. തറയിലിറങ്ങി നിൽക്കേണ്ടിവരുന്നില്ലല്ലോ. നമ്മൾ ജനങ്ങൾ സ്ഫോടനങ്ങളിൽ മരിച്ചു കൊള്ളാം. നിങ്ങൾ വീഴ്ചപറ്റിയെന്ന് പ്രസ്താവന നടത്തിക്കൊണ്ടിരിക്കുക.

റോഡുവികസനത്തിനു തടസമാകുന്ന ക്ഷേത്രങ്ങൾ പൊളിച്ചുമാറ്റാത്തതിൽ സർക്കാരിനു കോടതിയുടെ വിമർശനം.
അങ്ങോട്ട് ചെല്ലാൻ പറഞ്ഞു.പൊളീച്ചു മാറ്റാൻ. അമ്പലം, പള്ളി, ചർച്ച് ഇതൊക്കെ ആരുടെ അച്ഛന്റെ നെഞ്ചത്തും സ്ഥാപിക്കാം. പിന്നല്ലേ റോഡിൽ.

Monday, August 29, 2011

ഡി.ഐ.ജി അറസ്റ്റിൽ


കുറിപ്പുകൾ

ഡി.ഐ.ജി അറസ്റ്റിൽ

ട്രെയിനിൽ മദ്യപിച്ച് യാത്രചെയ്ത് യാത്രക്കാരെ ശല്യം ചെയ്ത ഡി.ഐ.ജി യെ പോലീസ് പിടിച്ചു. പോലീസിനെ വെട്ടിച്ച് ഓടാൻ ശ്രമിക്കവേ ഓടിച്ചിട്ടും പിടിച്ചു.

കൊള്ളാം; നല്ല ഡി.ഐ.ജി!  നല്ല കേരളം!

പ്രതിപക്ഷത്തിരുന്ന് എന്തും പറയാം, ചെയ്യാം: തിരുവഞ്ചൂർ

പ്രതിപക്ഷത്തിരിക്കുമ്പോൾ നിയമം നോക്കാതെ എന്തും പറയുകയും പ്രവർത്തിക്കുകയും ചെയ്യാമെന്നും മന്ത്രിയായാൽ നിയമം നോക്കിയേ എന്തും പറയാനും  ചെയ്യാനും   കഴിയൂ എന്നും അട്ടപ്പാടി വിഷയത്തിൽ  റവന്യൂ  മന്ത്രി തിരുവഞ്ചൂർ രാധാകൃഷ്ണൻ!

സത്യം   വിളിച്ചുപറഞ്ഞ മന്ത്രിയ്ക്ക് നന്ദി!

ഓമ്പുരി ഖേദം പ്രകടിപ്പിച്ചു

അന്നാ ഹസാരെയ്ക്ക് പിന്തുണയുമായി ഡൽഹിയിൽ പ്രസംഗിച്ച നടൻ ഓമ്പുരി രാഷ്ട്രീയക്കാരെയും പാർളമെന്റ് അംഗങ്ങളെയും മന്ത്രിമാരെയും താറടിച്ച് ചളുവാ അടിച്ചതിൽ ഖേദം പ്രകടിപ്പിച്ചു. വിദ്യാഭ്യാസമില്ലാത്ത രഷ്ട്രീയക്കാർക്കു മുന്നിൽ ഐ.എ.എസുകാരും ഐ.പി.എസുകാരും താഴ്മയോടെ നിൽക്കുന്നതിൽ ഓമ്പുരിയ്ക്ക് ലജ്ജ തോന്നുന്നുവെന്ന് അദ്ദേഹം പറഞ്ഞിരുന്നു.

ഇതാണ് മിസ്റ്റർ ഓമ്പുരി വിദ്യാഭ്യാസം കൂടി പോകുന്നതിന്റെ കുഴപ്പങ്ങൾ! വാതുറന്നാൽ പിന്നീട് ഖേദിയ്ക്കേണ്ടി വരും!

അദ്ഭുതസ്വർണ്ണക്കുടം  തട്ടിപ്പ്

അദ്ഭുതസ്വർണ്ണക്കുടം വില്പനനടത്താനെന്ന പേരിൽ തട്ടിപ്പ് നടത്തിയ സംഘത്തെ പിടികൂടി. അരിമണികൾ ആകർഷിക്കാൻ കഴിയുന്നതടക്കം അദ്ഭുത സിദ്ധികളുള്ള ഈ കുടങ്ങൾക്ക് അന്താരാഷ്ട്രമാർക്കറ്റിൽ കോടികൾ വിലമതിക്കുമെന്ന് വിശ്വസിപ്പിച്ചായിരുന്നു തട്ടിപ്പ്. അൻപത് ലക്ഷം, പത്ത് ലക്ഷം തുടങ്ങിയ വലിയ തുകകൾ പലരിൽ നിന്നും തട്ടിയെടുത്തത്രേ!

ശസ്ത്രയുഗത്തിലെ അദ്ഭുതങ്ങളാണ് ഈ തട്ടിപ്പിനിരയായവർ എന്ന് പറയാതിരിക്കാൻ  കഴിയില്ല.

പറവൂര്‍ പെണ്‍വാണിഭ കേസ് പ്രതിയുമായി തച്ചങ്കരിക്ക് ബന്ധമെന്ന്

പറവൂര്‍ പെണ്‍വാണിഭക്കേസിലെ പ്രധാന പ്രതിയായ മണികണ്ഠനുമായി തച്ചങ്കരി ഭൂമി ഇടപാട് നടത്തിയെന്നും ഐജിയായിരിക്കെ തീവ്രവാദികളുമായി ഫോണില്‍ ബന്ധപ്പെട്ടുവെന്നുമാണ് ആക്ഷേപം!

അത്തരം ചില ബന്ധങ്ങളൊക്കെയില്ലെങ്കിൽ പിന്നെ എന്തോന്ന് ഐ.പി.എസ്, എന്തോന്ന് ഐ.എ.എസ്! അല്ലേ തച്ചൂ‍ ? 

മാനവികലോകം


മാനവികലോകം